Susukatën da kamin lanang
ëd dalin a ag mi nin anggan atatdang.
Susukimatën da’y sukusukong
na kakamarërwa mi, aglapigan
naalmo da’y dolyar a abayag lan nababalang.
Dia’d Manaoag, tinaynan na sanaagi
so tinawir dan komun. Intilak da’d bulirëk
piyan araroën, tanëman, pabunaën.
Insalat da’y bëlas, mais, mangga
ëd amungkog iran plantasyo’y pananisia
ëd Hawaii tan California.
Nëngnëng mo, pinabli. Asigta ka.
Talaranan mo’y ilërëg toniyan banwa
ëd tambib na kalawaka’y andi anggan ëras.
Mankanta ka, o panangasim, mankanta ka.
Imbangat da kamin sanaagi
oniya’y dugan panamës,
pangisulong na kawës, panatës
oniya’y pangilukas na sangi,
pamikëwët na dila piyan mangatit
makasukbit na anggan katiting
a singob na inawa.
Anggapo’y nasadsara’y ësaës na puso
ëd dalin a dinëlap na binmëbëtël a lingët.
Anggapoy ontubon ilik ëd talogtog a binalkot na
niyebe tan tawën a ambilbilungët.
Anggapoy onarutoy a anlong ëd sweron
akasuksok ëd ulat a abara’y kinmigtël a ilalam.
Diad sukong na abung
nakar dan impanis lan impanis
so inkuan dan tulong tan panangaro.
Wadma’y ugaw bangbalët
binalëgan to lay panalalagar
ëd isabi dan panëmët na panis lalamët
pangibuyboy da’d sikato katayatdang to
na amin dara’y ag da atuor a plano,
na amin dara’y impapawit dan gonigon,
ërmën, panaburido.
Patalos: bulosan means to be free